روشتة لتغيير مصر

مش هنتكلم عن دور كل فرد فى التغيير – اقصد تفاصيل التغيير– هنتكلم بصورة عامة – ازاى مصر تتغير –ايه اللى يخلينا ننطلق- ايه اللى يرفع الاغلال اللى مقيدانا – ايه اللى يخلينا للدول الكبرى راس براس وند بند – عندنا ارض ومساحة – عندنا طاقة بشرية جبارة وشباب يهد جبال – عندنا كل مصادر الطاقة – عندنا علماء بنفتخر بيهم ليل ونهار فى كل العالم – عندنا تاريخ وحضارة ابهرت العالم كله –عندنا ايمان واديان سماوية تخلينا نبنى ونحب بعض – عندنا رجال اعمال مخلصين – عندنا حب للوطن وعاوزينه يكبر ويعلى علشان مستقبل اطفالنا – يبقى لازم نبنى مصر .
علشان نتكلم عن مصر جديدة يبقى بكل بساطة لازم نشوف نقاط ضعفنا ونصلحها ونفتح ملفات عناصر الاصلاح - ونستغل الروح الجديدة اننا نبقى بنى آدمين نبنى ما نهدش - لابد من اعادة صياغة الملفات الخاصة باصلاح مصر بما يتناسب مع مصر الجديدة وتعالوا نتكلم عن ملف ملف :-

اولا ملف العدل:-
###################### عدل وعدالة يعنى مفيش احباط – يعنى ليا حقوقى – يعنى بلدى بتخافى عليا زى ما بخاف عليها
مش انا ازرع وغيرى يجنى مش انا ابنى وكرباج بيضربنى مش انا اتهان علشان بقول الحق

اذا قلنا العدل فالمقصود به الاتى :-
*****************************
• القضاء النزيه الحر المستقل الذى لا يتم توجيهه
• سيادة القانون على الوزير زى الغفير مش فلان يطبق عليه القانون علشان غلبان وفلان نسفره بره علشان ينفد بجلده لانه مسنود
• الداخلية ذراع العدل القوية وليست اداة بطش وتنكيل
• ان يعرف المواطن ما له وما عليه وان يثق ان القضاء هو العدل والحق حتى لو كان الحكم ضده
• اقول الحق بدون خوف وبدن اهانة وانا واثق ان العدل هياخد مجراه مهما حصل ومحدش هيغير اتجاهه

ثانيا العدالة اجتماعية
يعنى ايه:-
****************** يعنى الخير اللى فى البلد الكل بيشوفه مش ناس وناس- يعنى مفيش حرمان- يعنى الفقر ما يكونش هو العنوان فى بلد غنى زى مصر عندها ثروات كتير – يعنى تضييق الفجوات بين المجتمع
• يعنى مفيش واحد بياخد مليون جنيه مرتب فى الشهر وواحد تانى بياخد 300 او بيجيب اكله من الزبالة
• مفيش عبيد واسياد خلاص عصر العبودية ولى -- حتى لو اختلفت الدرجات كل انسان له وظيفته ولها احترامها- الزبال زى الوزير – المدير زى الساعى فى الحقوق والواجبات تجاه الوطن – انا بتكلم كمواطنين علشان كلامنا ما يتفهمش غلط
• مجتمع بيساعد بعضه وبيكفل من لا عائل له
• تكافؤ الفرص وانتهاء الواسطة والمحسوبية ووجود معايير يتم على اساسها االتشغيل والترقية والاختيار
• انهاء الظاهرة القديمة بتغليب اهل الثقة على اصحاب الكفاءة فى كل شتى مجالات الحياة
• حرية الرأى المرتبطة بضوابط دينية واجتماعية
ثالثا ملف الصحة:-
########### مجتمع مريض يعنى مفيش منه فايدة - يعنى عبء على الوطن – يعنى مفيش انتاج – يعنى بنفكر بس نعالج نفسنا طول الوقت وعملنا نفسنا فيران تجارب لان المريض غريق بيتعلق فى قشاية طيب نعمل ايه علشان موضوع الصحة ده
نفتح فرع لكلية طب فى كل محافظة لان المستوى الطبى بيرتفع بالجانب التدريسى- فيه عندنا اطباء والله ما يعرفوت غير اللى خدوه فى الكلية من 20 سنة وحتى ما بيكلفوا نفسهم يشوفوا التلفزيون علشان يعرفوا جديد
• تأمين صحى بجد الدولة تشيل نصيب الاسد فيه يضمن كل مواطن انه يتعالج حتى لو مش تبع شركة او تبع اى مؤسسة
• مراكز بحوث وتحاليل طبية على اعلى مستوى تساعد العلماء انهم يتقدموا
• ميزانية للصحة تتصرف على الصحة بجد
• نشوف الاسباب الجانبية اللى ادت لتدهور الصحة زى التلوث وادخنة المصانع والمبيدات والاسمدة الممنوعة والبلاوى اللى جايلنا من برة هدايا
• حملات توعية للوقاية
• امصال متوفرة لكل الامراض
• نقل تجارب الدول الاوربية فى النهوض بالصحة ورفع المستوى الصحى

رابعا ملف التعليم والبحث العلمى :-
########### مجتمع جاهل يعنى اى شىء ممكن يتعمل فيه – مجتمع جاهل يعنى سهل الانقياد يساق كما الانعام – مجتمع جاهل مش هيتقدم خطوة للامام–مجتمع جاهل بيقدس الحاكم وبيكون له عبيد – مجتمع جاهل مفيش مستقبل- مجتمع جاهل يعنى مرض وفقر – مجتمع جاهل يعنى العوبة فى ايد الداخل والخارج- مجتمع جاهل يبقى اقتصاده على مستوى جهله- مجتمع جاهل يبقى حكومته اجهل منه
طيب نعمل ايه:-
التعليم مش عاوز وزير وخلاص- التعليم عاوز لجنة علماء تعمل وثيقة لاصلاح التعليم – ايوة وثيقة يجتمع فيهل كل علماء وحكماء مصر والوزير عليه يطبق اللى فى الوثيقة ويلتزم بيه
لجنة العلماء والحكماء عليها ان تتابع تنفيذ الوثيقة المتفق عليها لاصلاح التعليم ويجب ان تتضمن الوثيقة ما يلى :-
• تطوير مناهج التعليم بما يتناسب مع مصر وليس مناهج منقولة ولا جدوى من تطبيقها
• اصلاح حال المعلم بما لا يجعله يكون مضطرا لاعطاء دروس خصوصية والضغط على طلابه لذلك
• عمل حلول جذرية لموضوع الدروس الخصوصية – بحيث تكون هناك ثقافة ان الدروس الخصوصية ما هى الا اسباب ضياع التعليم بشرط ان نصلح حال المعلم اولا
• توفير الوسائل والموارد التعليمية المناسبة
• ربط التعليم الجامعى والابحاث بالمؤسسات والشركات او بمعنى آخر النظرية بالتطبيق
• تبَنى الوثيقة التعليمة (او عمل لجنة اخرى تضم علماء مصر) لموضوعات البحث العلمى وكيفية تمويل الافكار الجادة سواء من الحكومة او من رجال الاعمال
• تطوير التعليم الخاص ومحتوياته بما لا يخل بعملية التعليم واخراج كوادر قوية تساعد فى النهضة

ملف الاقتصاد:-
############# اقتصاد قوى يعنى زراعة والقطن المصرى والارز المصر والقصب المصرى زى زمان- يعنى صناعة – يعنى انتاج – يعنى تصدير – يعنى بورصة قوية – يعنى مفيش اقتراض – مفيش اعانات – مفيش ديون خارجية وديون داخلية واذون خزانة – مفيش جدولة ديون – مفيش املاء شروط علينا – مفيش عجز فى اكلنا –
• مصر ترجع بلد زراعى زى زمان – بدون قيود وبدون افتكاسات – الفلاح المصرى عارف يعمل ايه لو الافتكاسات هتعطلنا يبقى ببساطة فلاحنا اللى مش متعلم ا يعرف يجيب لنا اكلنا
• ملفات تعمير الصحرا ومشروع الدكتور الباز والعلماء الكرام لازم تدخل حيز التطبيق
• الاستثمار وتشجيعه بطرق مستحدثة علشان يبقى عندنا مشاريع قوبة ومحترمة وتصدير
• عوائد القناة والسياحة والجمارك والضرائب يتم اعادة توجيههم بما يخدم مصلحة الاقتصاد وليس كالسابق
• اعادة التخطيط لتنمية سياحية شاملة تضمن لمصر ان تكون بلد سياحى بمعنى الكلمة وبما يضمن جذب سياحى حقيقى لمصر فمصر بتاريخها ليست اقل من دول كثيرة سبقتنا للاسف فى السياحة وحاجة جميلة ان الناس بتطالب بعودة السايحة زى المسيرة اللى هتبقى بكرة فى السويس ان شاء الله
• تشجيع التصدير وتخفيض رسومه وتشجيع المصدرين وتخفيض مصروفات الطاقة والضرائب للشركات المصدرة
• تعديل القوانين الجمركية العتيقة بما يفيد حركة الاستثمار

ده تصور سريع لروشتة علاج مصر – وطبعا الحكومة مش كل حاجة – كل فرد لازم يقوم بدوره ويعمل اللى عليه فى مكانه فى شركته – فى مصنعه – فى حقله – فى مدرسته- فى بيته- فى الجامع – فى الكنيسة كل ده علشان نقدر نبنى مصر بجد

إضافة إلى المفضلة

المفضلة

إرسال إلى صديق

المشاهدات: 333

التعليقات (0)

RSS خاصية التعليقات

أضف تعليق

الإسم

البريد الإلكتروني

التعليق

تصغير | تكبير

الإشتراك بواسطة البريد الإلكتروني (الأعضاء المسجلين فقط)

نعم قرأت و أوافق على شروط الإشتخدام.

أضف تعليق